Roldan: Hagit sa bag-ong panahon

-A A +A

Ni Emmanuel C. Roldan

Nota Bene

Monday, March 30, 2015


SEMANA Santa na. Panahon kini nga atong hinuklogan ang pasyon, pagkamatay ug pagbanhaw ni Jesus nga atong Manluluwas. Gitawag kini sa simbahan nga "Paschal Mystery."

Tinuod nga sobra 2,000 na ka tuig ang nilabay sa pagkamatay ni Jesus nga anak nila ni Jose nga karpentero ug Maria nga Nazarenhon. Apan hangtud karon, wa pa mahuman ang debati sa mga sekta sa relihiyon kung Diyos ba si Jesus o dili.

Matud pa sa mga kadagkoan sa Judeo nga kababayan ni Jesus nga dili Diyos si Jesus apan sama ra kanila nga tawo nga gisilotan ni Pontio Pilato, ang Romanong gobernador nga nagdumala sa Israel, tungod sa iyang pagtukod og laing relihiyon nga sukwahi sa ila.

Advertisement

Sa laktod nga pagkasulti, wala dawata si Jesus sa iyang mga tagilungsod kay lahi ang iyang ginatudlo nga gikasuko sa mga hataas nga pari sa Judeo.

Para kanila ordinaryong tawo lamang si Jesus nga may talagsaong abilidad sa pagdani og tawo ug pag-ayo sa masakiton mao nga daghan ang niuban kaniya.

Para kanila dili si Jesus ang gipanagna nga Manluluwas sa Pentateuch o ang lima ka libro sa Daang Tugon o Bibliya nga maoy sumbanan sa ilang pagtuo.

Apan ang mga sumusunod ni Kristo nga gitawag og mga Kristiyano nagatuo nga si Jesus mao ang Manluluwas nga gipanagna sa kasulatan ug maoy tinubdan sa Bag-ong Tugon.

Alang sa mga Kristiyanos nagpakatawo ang Amahan pinaagi sa way pagduha duhang pagdawat ni Birhen Maria nga manamkon ni Jesus aron tubuson ang sala sa kalibutan nga napuno sa sakit, kasilag, pagdumot ug pagkabahin-bahin tungod sa tawhanong kahakog ug kabangis.

Sa mga Kristiyanos, si Jesus 100 porsiyentong tawo ug 100 porsiyentong Diyos.

Sa laing bahin, ang mga Muslim nagatuo nga sama kang Mohammad, si Jesus usa ka propeta nga gipadala sa Allah sa kalibutan aron mosabwag sa maayong balita sa kaluwasan. Para kanila si Jesus dili Diyos nga simbahon apan usa ka propeta nga respetuhon tungod kay gipili siya ni Allah nga mahimong magsisibya sa iyang pulong.

Hasta si Maria, ang inahan ni Jesus, giila ug girespeto sa mga Muslim tungod sa ilang talagsaong papel nga gihuptan sa plano sa kaluwasan sa kalibutan. Mao kini ang hinungdan ngahong gitawag ang Islam og "nahatungang pagtuo" tungod kay sa unang bahin, wala ilha sa mga Judeo nga anak sa Diyos ug Manluluwas si Jesus samtang sa laing bahin, naghinobra sab ang pagtuo sa mga Kristiyano nga Diyos ug Manunubos si Jesus.

Apan para kanako, dili na kinahanglang lalisan pa kung kinsa ang sakto. Mas bililhon kanako ang pag-ila sa mensahe nga gipadangat kanako sa kasaysayan sa atong pagtuo ug giunsa kini pagtuhop sa kasingkasing - ma-Judeo, Muslim o Kristiyano man.

Alang sa mga Kristiyano, ang pagdawat nato sa bunyag sa tubig ug Espiritu Santo gawas sa pagkalambigit nato sa maong komunidad nagpaambit kanato sa tulo ka misyon ni Kristo sa kalibutan.

Kini mao ang misyon sa pagkahari, pagkapari ug pagkapropeta sa atong bag ong panahon.

Gipakita kini sa tiunay nga pagserbisyo sa uban, pagkamaalampuon nga masaligon sa Amahan ug pagkinabuhing sulundon. Hagit kini natong tanan!

Gipatik sa mantalaang SuperBalita Davao Marso 31, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!