Roldan: Men's Month na pod?

-A A +A

Ni Emmanuel C. Roldan

Nota Bene

Saturday, March 28, 2015


HINAPOS na sa bulan sa Marso. Siyempre espesyal kini sa mga kababayen-an kay Women's Month man, busa nagkadaiyang arangkada ang ilang gibuhat aron magmalampuson ug mabulukon ang ilang pagsaulog. Sugod pa sa Pebrero ang ilang pagpangandam kay nagpahigayon sila'g Women's Summit sa mga distrito hangtud sa pag-abot sa International Women's Day niadtong Marso 8.

Didto sa kaulohan, nag-show of force sab ang mga kababayen-an sa ilang "Women for Peace march". Ilang gisinggit ang pagpadayon sa kalinaw sa Mindanao pinaagi sa pagpasar sa Bangsamoro Basic Law (BBL) nga natanggong sa hawanan sa Kongreso tungod sa Mamasapano encounter niadtong Pebrero 25.

Sa laing bahin, gibalita usab nga kapin 125,000 na ang namakwit didto sa Maguindanao ug kasikbit nga lugar tungod sa all-out offensive batok sa Bangsamoro Islamic Freedom Fighters (BIFF) nga niapil sa bahug-bahog sa Mamasapano ug nagtago kuno sa usa ka kauban ni alyas Marwan nga si Kumander Basit Usman.

Advertisement

Kasagaran sa nabiktima sa giyera kay mga babaye ug bata busa sakit kaayo mamati sa atong lideres sa kaulohan nga modeklara'g "all-out war" sa tanang Muslim sa Mindanao. Maayo silang sultihan nga kamo kunoy puyo sa Maguindanao kung lalim ba?

Seguradong nagkapuliki ang mga International non-government organizations (NGOs), gobyerno ug ahensiya sa United Nations sa pag-ayuda sa bakwit ug pagpabalik sa ilang kahimtang.

Ang mga NGO partners sa Cotabato nangandam sa ilang pagtukod og Child-Friendly Spaces (CFS) isip psychosocial first aid sa mga bata ug batan-on nga biktima ug Women-Friendly Spaces (WFS) para sa mga edaran, may sakit, buntis o nagpasuso nga babaye.

Basi sa kasinatian, kinahanglang ayudahan ang bakwit gikan sa duha hangtud sa unom ka bulan human sa nahitabong katalagman aron makabakod pagbalik.

Ang mga lalaki nga nawad-an og trabaho kinahanglang makabenepisyo sa ginahatag nga "food-for-work program" ug ubang ayuda sa panginabuhian. Bisan tuod hataas na ang atong kasinatian sa pagpagahum sa kababayen-an, angayan gihapon nato silang tabangan. Sa pagkatinuod, dako ang papel sa kalalakin-an sa tiunay nilang kalambuan.

Dunay programa kaniadto nga MR GAD (Men's Responsibility in Gender and Development) ang usa ka NGO nga nisuporta sa pagpalambo sa kababayen-an sa Davao. Kasagarang sakop niini kay may dagkong puwesto sa gobyerno ug pribadong pundok apan wala nagpadayon hangtud nga nahunong ang operasyon sa maong NGO.

Karong bag-o adunay ipahigayong pag-organisa sa gitawag nga "Men's Support Group" ang Talikala Inc., usa sa mga karaang NGO alang sa kababayen-an sa Mindanao. Imbis nga mga adunahan, ilado ug de kurbata ang moapil niini, ang mga yanong lalaki sa gi-target nga komunidad ang imbitahon sa serye nga "Kulukabildo sa Lalaki sa Komunidad" (KLK) nga magsugod karong adlawa hangtud sa Oktubre o Nobyembre niining tuiga.

Buot sa Talikala nga makatukod og mga "champion" sa katungod sa kababayen-an ug kabataan sa han-ay sa kalalakin-an sa Davao nga maoy katambayayong sa pagpalambo sa ilang pamilya, komunidad, kaugalingon ug pagprotekta kanila sa ilang komunidad.

Tun-an usab sa mga lalaki ang mga balaod ug programa sa gobyerno para sa babaye ug paagi sa maayong relasyon ug panginabuhian sa pamilya. Basin puhon tungod niini naa nay Men's Month, di ba? Ato ni, Pare!

Gipatik sa mantalaang SuperBalita Davao Marso 28, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!