Mongaya: Davao: uyon o dili uyon?

-A A +A

Ni Anol Mongaya

Panahom

Monday, March 30, 2015


DAGHAN ang nakita nako nga maayo nga kalambuan sa Syudad sa Davao sa among pagbisita sa miagi nga pipila ka adlaw. Dunay nakauyon. Apan duna say wala makauyon.

“Naanad na kami nga matulog og sayo aron sayo sab makasugod sunod adlaw,” matod pa sa usa ka batan-ong negusyante. Mao kini ang iyang tubag dihang nangutana ko kabahin sa nightlife sa maong syudad.

Nakapanguta mi niini tungod sa striktong pagpatuman sa liquor ban inig ala 1 sa kaadlawon. Matod pa, mag-last order ka na inig alas 12 ug angayang mahurot kini inig panirado sa establisemento inig ala una.

Advertisement

Nagkanayon ang maanyag nga negusyante nga naandan na man gyud kining Davao nga sentro alang sa pagnegusyo. Ug laing kaila niingon nga malipayon ang mga negusyante kay tungod sa kahapsay ug kalinaw sa dapit, manggawas na ang mga taga Davao aron mangaon. Tungod niini, nidaghan ang mga kan-anan.

Testigo gyud noon ko sa ka-alegre sa mga kan-anan sa Jack’s Ridge ug sa Matina Town Square labi na sa panahon sa panihapon sa miaging Sabado. Apan, dali sab kaayo kining mamingaw tungod sa liquor ban sugod sa ala una sa kaadlawon.

Gani, grabing bagulbol sa duha ka mga drayber sa taxi nga akong nasakyan Biyernes mga alas 10 sa gabii. Alang kanila, namatay ang nightlife sa Davao tungod sa maong ordinansa ug usa sa naigo mao ang mga drayber sa taxi.

Anti-crime

Akong masabot nga daghan sa Davao ang nakauyon sa paggukod sa mga kriminal. Ok ra man, matod pa, basta dunay warning sa dili pa birahan.

Abante sab kaayo ang CCTV system nga gigamit sa traffic management ug sa intelligence batok sa krimen sa syudad. Ug atong nasayran nga sunod nilang buhaton mao ang facial recognition.

Nagpasabot kini nga daling mailhan ang mga nawong nga makita sa CCTV.

Sayang lang kay wa ko makapangutana nganong wa makakuha ang CCTV system diha sa kadalanan sa nipatay sa Sugboanon negusyante nga si Richard King.

Ako lang klaruhon nga wa ko makauyon sa paagi nga mogamit og mga vigilante. Bisan pag dunay warning, wa man na magpasabot nga gitahod na ang tawhanong katungod ug ang due process.

Sigi sab ko og hinuktok kabahin sa politikanhong gamit sa CCTV system. Dali na kaayo mahibal-an kon kinsa ang nanambong sa mga tigum sa kontra sa politika.

911

Bisan pa man niining maong wa pag-uyon, nangangha ko dihang nangadto ang among grupo sa mga sakop sa media ug mga blogger sa headquarter sa ilang 911. Lalim bay, andam sulod sa usa ka building ang 27 ka mga ambulansya, ang siyam ka firetruck, ug siyam ka mga rescue vehicle.

Dunay daghang mga rubber boats nga magamit sa rescue kon magbaha. Dayon, naa pa gyud duha ka mga amphibian vehicles.

Duna ba ang Syudad sa Sugbo niini? Ang ako lang gyung ma-imagine sa atua kay ang CCMC nga nag-squat sa buhatan sa Bureau of Fire. Igo lang ko mangawot sa ulo kon dunay mangutana kanus-a mahuman ang bag-ong CCMC.

Sa pagkakaron man gud, nalangay ang pagsugod sa pagtukod niining bag-o ug modernong CCMC tungod sa mga problema sa bidding.

Dayon, di sab kumpleto pa ang budget nga nagahin sa Syudad sa Sugbo. Nagkinahanglan kini og P1.2 billion. Apan ang nagahin sa Konseho moabot lang og P600 milyones. Gikuhaan pa gyud kay way pundo alang sa hinabang sa mga senior citizen sa miaging Disyembre.

Sa planong mangutang na lang ang Syudad sa Sugbo, duna pa gyuy policy ang Land Bank kinahanglang pabor ang mga miagi nga audit sa COA. Ang nakaapan kay negatibo ang resulta sa audit.

(@anol_cebu sa Twitter)

Gipatik sa mantalaang SuperBalita Cebu Marso 31, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!