Nadela: Paghandom sa kamatayon

-A A +A

Ni Junrey Nadela

Asoy ni

Sunday, March 29, 2015


SA ikaduhang tuig nag­laum ang taga Barangay Gaas lungsod sa Balamban nga mas modaghan pa ang mga tawo nga modagsa sa subling pagpahigayon sa Daub 2015. Ang Daub maoy naandan nga gimbuhaton sa mga tawo didto dayong sawop sa adlaw matag Biyernes Santo.

Giisip nila nga pagbilar sa namatay nga si Hesukristo. Mga sulo nga giugsok daplin sa karsada ug gagmayng dalan ang pasigaon. Adto ni mosangko sa usa ka bungtod diin nahimutang ang dakong daub duol sa dako nga krus. Ning dapita himuon ang mga relihiyosong kalihukan sama sa pagpakumpisal ug pag-ampo. Sa ato pa solemn ni kaayo ang mga kalihukan didto sa tibuok gabii. Nasayod naman ta nga mamahit sa atong kaunoran ang kabugnaw sa temperatura didto, ang dakong daub magsilbi nga panagang. Busa kinahanglan nga dad-on ninyo ang kinabag-an nga jacket kay kanunay ra ba nga nag-fog didto.

Sa asoy ni Kapitan William Genel tradisyon na sa mga molupyo sa maong barangay ang pagtukaw sa gabii sa Biyernes Santo. Mao nga mag-ugbok sila og mga sulo gamit ang bagakay o kawayan. Sa niaging tuig lang gipalapdan sa barangay ang maong tradisyon ubos sa pagpakig-alayon sa Parokya sa Buanoy diin sakop ang maong barangay. Niingon si Kapitan Genel nga di lang taga Gaas ug silingang barangay ang nisalmot sa Daub sa niaging tuig. Nangabot sab didto ang mga taga siyudad. Mao nga alang sa mga bisita sa Daub 2015 karong Biyernes doble ang ilang gihimo nga pagpangandam. Apil na ang room accomodation sa usa ka mountain resort nga di layo sa nahimutangan sa Daub. Matod niya di kaayo mahal ang pag-estar sa maong resort. Duna sab sila’y giandam nga mga tulda sa palibot sa Daub alang sa uban nga gustong magpalabay sa kagabhion ug gusto sab og adventure. Mga lagutmon sab diay ang andamon sa barangay alang sa mga bisita pahaum ning panahon sa pagpuasa. Sa mga way sakyanan may mga V-hire nga magbiyahian sa dapit gikan sa Ayala ug duna say daghang habalhabal nga naa nagparada sa may JY  Lahug.

Advertisement

SIGURIDAD

Sa tanan nga mobiyahe ning panahona ilabi na sa mga bakasyonista angay nga mag-amping diha sa karsada o sa dagat nga inyong agian. Gawas niini, ang kainit sa panahon di sab kakumpiyansahan ilabi na niadtong may problema sa ilang blood pressure. Tambag sa taga Depart­ment of Health pagbawon og daghang tubig nga mainom.

Gipatik sa mantalaang SuperBalita Cebu Marso 30, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!