Barrita: Asa ang palabihon: drugs o HIV-Aids?

-A A +A

Ni Eddie O. Barrita

Tikdul-Tikdol

Sunday, March 29, 2015


NAGKASUMPAKI ka­ron ang duha ka pundok sa Cebu City Hall kansang mga tumong ug katuyoan managlahi. Ang Cebu City Health Department (CHD) nanghatg og lib­reng mga syringe niadtong mogamit og injec­table drugs sama sa nubain diha sa Barangay Kamagayan ning dakbayan sa Sugbo.

Gitawag kini nga “harm reduction program” ug gitumong sa pagpugong sa pagkuyanap sa gikalisangang sakit nga HIV-Aids nga hangtod karon wa pay tambal.

Ang Kamagayan giila nga “red light district” sa siyudad, busa daghang commercial sex workers sa dapit. Dako ang kahigayonan nga kadtong mga adik-adik nga magbanosbanos og gamit sa syringe maka-infect sa mga baba­yeng nagbaligya sa ilang unod ug mas mokatap pa unya ang HIV-Aids.

Advertisement

Apan gisupak ang maong lakang sa Cebu City Anti-Drug Abuse Council kay matod pa makaikag kini sa paggamit sa illegal nga drugas. Tiaw mo bay libre na gud ang syringe, nubain na lang ang kuwang injection na dayon.

Dinhi mitumaw ang pangutana kon hain ang palabihon. Mosugot ba kita nga mokuyanap ang paggamit sa illegal nga drugas aron kapugngan ang pagkuyanap sa HIV-Aids? O mosugot ba kita nga mokuyanap ang HIV-Aids aron kapugngan ang pagkuyanap sa illegal drugs?

Ang tubag ning duha ka pangutana parrhong dili.

Si Cebu City Mayor Mike Rama niingon nga anga­yang i-review ang programa sa CDH kay di lalim ang sakit nga HIV-Aids. Gani, dunay 112 ka mga binilanggo sa Cebu City Jail nga gitakboyan niini.

Angay hinuon nga hingusgan ang kampanya batok sa illegal nga drugas. Kontrolon ang tinubdan sa nubain. Kay kon way nubain, unsaon pa man sa mga adik-adik ang libreng syringe? Unsa, magtinuslokay sila sa ilang mga mata?

Bahin sa pagkuyanap sa HIV-Aids, tinuyoan na gyud na. Di nato mabasol ang mga babayeng nagbalig­ya sa ilang dungog. Dihay pari nga nibisita sa usa ka red light district ug nisangyaw kanila nga mag-usab na. Mibalik siya sa paglabay sa unom ka buwan apan diha lang gihapon ang mga babaye. Apan usa kanila mihung­hong sa pari, “Nag-usab na mi dre. Kaniadto, diretso ra mig hayang. Karon, manguros una mi.”

Gipatik sa mantalaang SuperBalita Cebu Marso 30, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!