Bañoc: Pagsabot ni PNoy

-A A +A

Sunday, March 29, 2015


NGANONG hilom pa sa bao si Presidente Noynoy Aquino sa report sa Moro Islamic Liberation Front (MILF)?

Ang MILF sa ilang report miingon nga walay sala ang ilang fighters ug ang sad-an mao ang Special Action Force (SAF). Ilang gihulagway nga makatarunganon ang pagpatay sa MILF sa 44 ka commandos.

Si PNoy mikuwestyon sa report sa PNP Board of Inquiry (BOI) ug sa draft report sa Senado. Ang ilang report pulos nagbutyag nga sad-an si PNoy ug ang MILF namusil sa commandos nga wala nay ikasukol. Iya kining gihulagway nga kuwang kay wala siya kakuhai og pamahayag.

Advertisement

Apan sa dihang mipakita ang MILF sa kuno resulta sa ilang imbestigasyon, wala man gyuy bisan gamay nga komentaryo si PNoy. Ang miyembro sa peace panel sa gobiyerno nga si Miriam Ferrer miingon nga maayo ang report sa MILF.
Sabton ba nato nga ang pamahayag ni Ferrer mao usab ang baruganan ni PNoy?

Nagpasabot ba usab nga ang wala pagtingog ni PNoy mao na ang pag-uyon sa report sa MILF?

Ang MILF mireklamo nga namatyan sila og mga miyembro. Ipasabot ba ni PNoy nga sakto alang niya ang MILF ug ang sad-an kadtong 44 ka commandos nga nangamatay?

Sa miaging semana, subling namulong si PNoy nga gituohan nga kataposan na niyang mensahe sa insidente sa Mamasapano. Wala siya nanga­yo og pasaylo apan gipangayo niya ang pagsabot sa katawhan. Subling gipadayag ni PNoy nga wala siya napahibawo og sakto sa mao nga operasyon.

“Kung nalaman ko ito agad, sa tingin n’yo ba, hindi ako gagawa ng paraan para tulungan ang ating hanay?” ni PNoy.

Kinsa may ilaron ni PNoy nga kuwang ang iyang inpormasyon nga gikan sa pagplano hangtod nga gipatuman ang Oplan Exodus gipahibawo man siya sa mi-resign nga PNP Chief nga si Alan Purisima?

Niadtong Enero 9, si Purisima ug ang narelibohang hepe sa SAF ang mi-brie­fing ni PNoy sa Oplan Exodus aron dak­pon ang mga terorista nga sila si Marwan ug Basit Usman.

Pagka Enero 25, nagbayluay sila og text messages ni Purisima kalabot sa operasyon sa SAF sa Mamasapano.

Unya, patuohon tang PNoy nga wala siya kahibawo sa saktong inpormasyon sa operasyon? Maayo pa og angkunon na lang ni PNoy nga wala
siya nakapadala og reinforcement ug gibiyaan sa ere ang commandos kay nahadlok si PNoy sa MILF.

Tungod sa sobrang pagkahalin ni PNoy sa Bangsamoro Basic Law (BBL), bahala na lang para niya og pangtiwasan sa MILF ang wala nay
ikasukol nga mga sakop sa SAF.

Sayon ang paghatag sa katawhan og pagsabot kang PNoy kon wala pa siya namakak.

Gipatik sa mantalaang SuperBalita Cebu Marso 30, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!