Mongaya: Ingon niini sa Davao?

-A A +A

Ni Anol Mongaya

Panahom

Saturday, March 28, 2015


SYUDAD sa Davao – Karong nisibaw na ang planong modagan pagka presidente sa nasud si Mayor Digong Duterte, mapaabot kaha nato nga kining iyang mga gipangbuhat sa iyang siyudad mao sab ang buhaton sa tibuok nasud?

Nakapangutana ako niini tungod sab sa kampanya ni Bise Presidente Jojo Binay kaniadtong 2010 nga “ganito ang Makati.”

Ang syudad nga iyang gi­dumala sulod sa pipila ka tuig maoy atong matamdan kon unsaon kaha sa usa ka mayor kon mahimo siyang presidente.

Advertisement

Kang Binay pananglitan, nanghambog siya nga maoy nakapalambo sa Syudad sa Makati nga daw di kini malambuon tungod sa mga Ayala ug Makati Business Club sa wa pa siya mahimong mayor.

Makaingon ko nga dakong pangilad ang kang Binay kay kaniadtong 1985 ko unang nakaanha sa Makati ug mao na kini ang labing malambuong siyudad sa Pilipinas kay mao man kini sa ang business center sa nasud.

Niadtong tungora, nagmartsa-martsa pa si Binay batok sa diktaduryang Marcos ug wa pa mahimong mayor.

Digong

Tayming nga dia ako sa Davao karon human nitumaw nga lakip sa number 5, gani ang iyang mga tigsuporta moinsister nga ang mayor maoy number 2, aron masugdan natog kilatis sab ang mga iyang kalamposan.

Ang Davao pananglit naila nga dapit nga labing luwas ug malinawon sa nasud. Sukwahi kini sa nahitabo kaniadto diin daghan kaayo ang mga pinatyanay.

Sa panahon ni Marcos, daghang mga operasyon ang mga Sparrow unit sa NPA. Dihang nagsugod na sa pagka mayor si Duterte, nisibaw sab ang mga balita kabahin sa iyang hit squad.

Basta di lang iapil ang pagpatay sa negusyanteng si Richard King dinhi sa Davao sa miaging tuig, makaingon kita nga malinawon na ang dapit. Hinoon, mao lagi kining istorya nga tungod sab sa pagsiaw sa mga vigilante.

Ang labing preskong gibuhat ni Mayor Duterte dinhi sa Davao mao ang pagdili sa pag-inom og mga makahubog sugod sa ala una sa kaadlawon.

Tungod niini, sayo nga manirado ang mga kan-anan ug mga bar. Matod pa sa drayber sa taxi nga akong nasakyan, nawad-an silag kita kay nikunhod ang mga manggawas inig kagabii. Nikunhod sab kuno ang mga turista.

Hinuon, makapahimuot kay ang nakulangan sa pag-inom inig abot sa alas 12 o ala una sa gabii, mahimong moadto sa isla sa Samal kay way limit ang pag-inom-inom lakip na ang panigarilyo.

Suporta

Bisan pa man niini, usa ka peryodista sa Davao nagkanayon nga daghan ang nakauyon sa maong gibuhat sa mayor tungod sa pagkunhod sa krimen ug sa kalinaw.

Gani, matod pa, mas daghan karon ang mga taga Davao nga manggawas na aron manihapon. Tungod sab niini, nidaghan ang mga kan-anan.

Wa ko makumbinser gyud hinuon. Di ko maka-imagine sa Sugbo nga mamingaw sugod sa alas 9 sa gabii sa adlaw nga Birnes ug Sabado. Samot pa sa panahon sa Sinulog.

Alang kanako, gikinahanglan si Mayor Duterte mopakita nga di maguba ang turismo sa Pilipinas kon siya mahimong presidente.

Poe

Padayong taas ang rating ni Sen. Grace Poe sa labing ulahing survey. Ug atong nadunggan sa usa ka kasaligang tinubdan nga duna na kiniy kasabutan uban sa gipaabot nga standard-bearer sa Liberal Party nga si Mar Roxas. Di daw kuno siya makig-tandem kang Binay. Nganong Roxas? Kay ilang pangagpas nga inig lihok unya sa iyang organisasyon, mosaka ang iyang survey ratings. 

Hinuon, ang kampo ni kanhi senador Ping Lacson nagsulti sab nga ang ilang bise presidente mao si Sen. Poe. Dakong pangutana karon kon makatabang ba kaha ang popularidad ni Poe sa mga gustong modagan pagka presidente. Unsay tan-aw ninyo?

(@anol_cebu sa Twitter)

Gipatik sa mantalaang SuperBalita Cebu Marso 29, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!