Editoryal: Nindot nga timailhan

-A A +A

Saturday, March 28, 2015


NINDOT nga timailhan sa pagpakabana sa pagpanalipod ug pagpalambo sa kinaiyahan ang pag-apil sa mga dagkong kompaniya ug mga yano lumolupyo sa Earth Hour, kalibotanong kalihokan sa dungan nga pagpalong sa kuryente o dili paggamit sa enerhiya sulod sa usa ka oras alang sa pagpataas sa kahibalo ug pagpakabana bahin sa kalikupan.

Nagpasabot kini nga dunay dakong mahimo kon ang tanang maghiusa sa pagdaginot ug paggamit sa mas luwas nga tinubdan sa enerhiya, dili sama sa coal-powered plant nga komon nga tinubdan labi na sa mga kabos nga nasod sama sa Pilipinas apan dako og natampo sa polyusyon.

Dugang sa ubang tinubdan sa polyusyon sama sa mga dakong pabrika o planta, gikan sa mga sakyanan sa kamad-an ug kadagatan ug uban pa, kining tanan sa tibuok kalibotan nahimong nag-unang hinungdan sa pagkadaot sa ozone layer, tigsala sa makadaot nga ultraviolet (UV) rays sa adlaw nga dili direktang moigo sa kalibotan.

Advertisement

Sumala sa mga batid sa siyensiya, grabe na kadako sa buslot ang ozone layer tungod sa polyusyon o CO2 ug niresulta sa climate change hinungdan sa grabe kainit nga mamahit sa atong panit karon.

Pasagdan na lang ba nato kini? Ug tungod sa hulga nga kakuwang sa power sa Sugbo, mouyon na lang ba kita nga dunay laing coal power plant? Gikataho nga dunay laing coal-powered plant nga tukuron sa dakbayan sa Toledo sa kompaniya nga nalambigit na usab sa power distribution. Dili ba hulga usab sa pagbalik sa monopoliya sa enerhiya?

Dili kita magsalig sa Department of Energy (DOE) nga napamatud-an sa kasinatian nga pabor kanunay sa dagkong negosyo sa power generation, transmission ug distribution sa ngalan sa ‘kalamboan’ ug uban pang rason busa, magpakabana kita.

Gipatik sa mantalaang SuperBalita Cebu Marso 29, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!