Diola: Tuig sa mga kabos

-A A +A

Ni Carmelo Diola

Mao Diay

Saturday, March 28, 2015


BINASI sa Isaias 50:4-7; Salmo 22; Taga-Filipo 2:6-11; ug Marcos 14:1-15:47

“Ug gidala nila ang nating asno ngadto kang Jesus ug gihapin nila niini ang ilang mga kupo, ug mikabayo siya niini.”

Pagsulod nako sa lugar, nakita dayon nako ang pipila ka mga sakop sa akong team nga nanagpunay og hinlo sa mga plastik nga lingkuranan. Nalapukan ug abog man kaayo kini. Duol sa pultahan aduna poy laing pundok nga naghan-ay na sa rehistrasyon. Nagpahiyom silang tanan samtang nangalagad.

Advertisement

Niadtong milabay nga Sabado, Marso 21, gipahigayon ang usa ka espesyal kaayo nga espirituhanong pagbansaybansay kon spiritual recollection didto sa basement sa San Pedro Calungsod Chapel didto sa SRP duol sa ginatukod nga gambalay sa SM. Ang tema mao, “Do Justice and Love Kindness in the Year of the Poor”.

Gipahigayon kini sa “International Eucharistic Congress” sa “Solidarity and Communion Committee” niini kon IEC-SCC. Kini grupoha mo­pasiguro nga ang mga ka­bos adu­nay panagway ug tingog sa umaabot nga IEC. Haom kaayo kini sa gisaulog karon nga Tuig sa mga Kabos ug sa mga pahimangno ni Papa Francis mahitungod sa mga kabos. 

Ang naghatag og pamalandong sa maong panaghugpong mao si Arsobispo Jose S. Palma sa Sugbo. Gihisgotan niya ang pipila ka mga pahimangno ni Papa Francisco sama sa iyang perspektibo nga kon ang kahimtang sa mga kabos dili mahatagan og igo ug malahutayong pagtagad, ang mga katilingbanong problema dili gyod mahatagan og kasulbaran. 

Karong adlawa ang Domingo sa Lukay diin magpabindita na pod kita og mga lukay nga atong pagadad-on sa Misa. Diin man gikan kining maong tradisyon? Unsa may gipasabot niini?

Diha sa ebanghelyo sa usa pa magsugod ang misa, mabasa nato ang harianong pagsulod ni Jesus sa Jerusalem. Misakay siya og usa ka gamay nga kabayo nga wa pay nakasakay. Simbolo kini sa pagkahari ni Jesus nga adunay relihiyosong kahulogan. Ang mga mananap nga nating ug walay tatsa maoy gamiton sa mga relihiyosong ritwal. 

Samtang misakay siya niini, gihanig sa mga tawo ang ilang mga sapot ug giwarawara nila ang mga lukay samtang nagsinggit og “Hossana” nga gipasabot, “Ginoo, tabangi intawon!” Giila nila nga si Jesus adunay matabang kanila. 

Gipakita ang pagkahari ni Jesus diha sa iyang pagpaubos. Diha sa hataas nga ebanghelyo sulod sa Misa, masubay ang maong pagpaubos ni Jesus diha sa mga nagkalainlaing yugto niini, gikan sa pagbudhi kaniya ngadto sa paglansang kaniya sa krus. Makita usab kini sa mga insulto ug pagdagmal nga nadawat ni Jesus, sumala pa ni propeta Isaias.

Si Pablo sa iyang sulat ngadto sa mga taga-Filipo nakasabot niini sa dihang gihisgotan niya ang paghaw-as ni Jesus sa iyang kaugalingon diha sa iyang pagkahimong tawo ug ang iyang pagpalansang sa kaugalingon diha sa krus. 

Giawag ang matag usa kanato sa pagpaubos sa kau­galingon aron kita makasaulog sa Tuig sa Kabos sa labing makahuloganon nga paagi. Mao kini ang dalan sa karus. Mao kini ang dalan ni Jesus.

Gipatik sa mantalaang SuperBalita Cebu Marso 29, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!