Todino: Tiunay nga pagsakripisyo

-A A +A

Monday, March 30, 2015


PAGSUGOD og timaan sa 40 ka adlaw nga “Kuwarisma” niadtong Pebrero 18 diin gitakda ang “Miyerkules sa badlis” sagad sa mga tumotuo sa Romano Katoliko naghimo og pakigsaad.

Nagsingabot na ang pagtapos sa kasaulogan karon Dominggo sa pagkabanhaw apan daghan sa nihimo og pakigsaad napakyas sa pagtuman.

Samtang naglakaw ang katuigan, nagkalahi na usab ang pagtimaan sa kuwarisma.

Advertisement

Naobserbahan nato nga imbes mogahim og igong panahon alang sa Ginoo, pinaagi sa pagpamalandog, ang uban mas gigugol nila ang panahon sa bakasiyon.

Gani, basi sa report mosobra sa 200,000 ka mga tawo ang ningbakaisyon sa Baguio City karong panahona.

Ang uban, atua nagpahayahay sa ubang resort sa nagkadaiyang bahin sa nasod.

Mga artista nga gi-idolo kanunay sa mga tawo, mapasigarbohon kaayo nga mipahibawo kon unsaon nila paggamit ang hataas nga bakasiyon karong kuwarisma.

Sa tinuod nga Kristohanon, dunay kuwarisma o Lenten season o wala, naa kanunay kining mapadayonon nga pag-alagad.

Dili na mohimo pa og panaad o sakripisyo kay kon nagtuo ka nga nagkinabuhi ka diha ni Jesu-Cristo, nan, makita ang kalainan diha sa imong sinultihan ug paggawi.

Ang tinuod nga sakripisyo dili kanang pagpasakit sa imong kaugalingon pinaagi sa pagsamad, pagpalansang, pagsakripisyo og baklay sa estasyonan sa krus.

Kining matang sa sakripisyo dili kana makatumbas sa hingpit nga kasakit nga gihimo sa Ginoo dihang giangkon niya ang tanang kasal-anan sa tawo.

Kon nagtinguha man kita og tiunay nga sakripisyo atong ikinabuhi ang gusto sa Ginoo aron sa ingon niana nakig-ambit kita sa sakripisyo nga gihimo sa Dios.

Sa dinhi pa si Jesu-Cristo sa kalibutan gipakita niya ang maayo ehemplo sa pagkinabuhi nga kanunay magdependi sa iyang Amahan.

Iyang giatiman ang mga kabus, gipang-ayo ang mga masakiton, ug naghatag og maayong mensahi sa nagkasubo, nag-antos ug nagmasulob-on.

Ang pangutana, ato ba kanang gihimo sa atong pagkinabuhi karon sa kalibutan o mas giuna ato ang personal nga katagbawan kay sa panginahanglan sa uban.

Ang Ginoo nag-ingon unaha pagpangita ang gingharian sa langit kay ikadugang ra unya niya ang uban.

Busa ang tinuod nga sakripisyo mao ang paghikaw sa imong kaugalingon alang sa kalibutanon nga katagbawon. Ihatag nato ang tim-os nga pag-atiman sa nagkinahanglan. Bisan sa gamay nimong sakripisyo, pananglit gikibhangan nimo ang budget sa paniudto ug gihatag ngadto sa walay gikaon, dako na kanang sakrisyo sa Ginoo.

Imbes mopalit ta og bag-o nga senina, atong igahin alang niadtong walay sapot, ug imbes igugol nato ang taas nga oras pagsunod sa teleserye, molakbit ta sa pagpaminaw sa pulong sa Ginoo. Imbes, maglagot ta sa atong kauban o silingan, ipakita nato ang tam-is nga pahiyom.

Gipatik sa mantalaang SuperBalita Cagayan de Oro Marso 31, 2015.

Opinyon

DISCLAIMER: Sun.Star website welcomes friendly debate, but comments posted on this site do not necessary reflect the views of the Sun.Star management and its affiliates. Sun.Star reserves the right to delete, reproduce or modify comments posted here without notice. Posts that are inappropriate will automatically be deleted.

Forum rules: Do not use obscenity. Some words have been banned. Stick to the topic. Do not veer away from the discussion. Be coherent and respectful. Do not shout or use CAPITAL LETTERS!